پاکستان تیزی سے عالمی ڈیجیٹل فنانس میں ضم ہو رہا ہے: وزیراعظم

اسلام آباد: وزیراعظم شہباز شریف نے کہا ہے کہ ڈیجیٹل ادائیگیوں اور مالیاتی جدت کی تیزی سے بڑھتی رفتار، پاکستان کی وسعت پاتی ڈیجیٹل معیشت کا لازمی حصہ بن چکی ہے اور ملک تیزی سے عالمی ڈیجیٹل فنانس کا حصہ بنتا جا رہا ہے۔

وہ اسلام آباد میں World Liberty Financial کے چیف ایگزیکٹو آفیسر زیکری وِٹکوف کی قیادت میں آئے وفد سے گفتگو کر رہے تھے۔ وزیراعظم نے وفد کا خیرمقدم کرتے ہوئے ڈیجیٹل پاکستان کے اپنے وژن پر روشنی ڈالی، جس کا مقصد عوام کے لیے رابطے، رسائی، شفافیت اور کھلے پن کو فروغ دینا ہے۔

وزیراعظم نے پاکستان کے ڈیجیٹل مالیاتی شعبے میں بڑھتی ہوئی بین الاقوامی دلچسپی کو خوش آئند قرار دیتے ہوئے کہا کہ یہ امر اطمینان بخش ہے کہ پاکستان تیزی سے عالمی ڈیجیٹل فنانس کے نظام میں شامل ہو رہا ہے۔

اس موقع پر زیکری وِٹکوف نے پاکستان کے ساتھ محفوظ اور شفاف ڈیجیٹل ادائیگیوں کے نظام، خصوصاً کراس بارڈر سیٹلمنٹ اور فارن ایکسچینج کے شعبوں میں تعاون میں گہری دلچسپی کا اظہار کیا۔ انہوں نے پاکستان کے پالیسی فریم ورک کو سراہتے ہوئے کہا کہ یہ ملک کو عالمی ڈیجیٹل فنانس کے میدان میں ایک مضبوط امیدوار کے طور پر ابھار رہا ہے۔

بعد ازاں حکومتِ پاکستان اور SC Financial Technologies LLC (جو ورلڈ لبرٹی فنانشل سے منسلک ادارہ ہے) کے درمیان ایک مفاہمتی یادداشت (MoU) پر دستخط کیے گئے، جس کا مقصد کراس بارڈر ڈیجیٹل ادائیگیوں کے جدید نظام پر تکنیکی تعاون اور باضابطہ مکالمہ قائم کرنا ہے۔

معاہدے پر وزیرِ خزانہ محمد اورنگزیب اور زیکری وِٹکوف نے دستخط کیے، جبکہ وزیراعظم شہباز شریف اور فیلڈ مارشل سید عاصم منیر نے معاہدے کی تقریب میں شرکت کی۔