زبردست مقابلہ : پرو لیگ میں ارجنٹینا نے پاکستان کو 3-2 سے ہرا دیا

سانتیاگو: ایف آئی ایچ پرو لیگ میں پاکستان نے شاندار فائٹنگ اسپرٹ کا مظاہرہ کیا، مگر تیز رفتار اور سنسنی خیز مقابلے میں میزبان ارجنٹینا معمولی برتری کے ساتھ فتح اپنے نام کرنے میں کامیاب رہا۔

میچ کے ابتدائی لمحات میں پاکستان زیادہ متحرک نظر آیا اور مسلسل حملوں کے ذریعے ارجنٹینا کے دفاع کو آزمایا، تاہم ابتدائی مواقع ضائع ہونے کے باعث اسکور نہ کھل سکا۔ ارجنٹینا کو بھی پنالٹی کارنرز ملے مگر وہ فائدہ نہ اٹھا سکا۔

دوسرے کوارٹر میں میزبان ٹیم نے ایک منظم حملے کے ذریعے برتری حاصل کی، جو ہاف ٹائم تک برقرار رہی۔ تیسرے کوارٹر میں پاکستان نے جارحانہ انداز اپناتے ہوئے گول برابر کر دیا، لیکن ارجنٹینا نے فوری ردعمل دیتے ہوئے پنالٹی کارنرز پر لگاتار گول کر کے اسکور میں واضح فرق ڈال دیا۔

پاکستان نے دباؤ برقرار رکھا اور کوارٹر کے اختتام سے قبل ایک اور گول کر کے مقابلہ پھر زندہ کر دیا، جس کے بعد آخری کوارٹر میں پاکستانی ٹیم مسلسل برابری کی تلاش میں رہی۔ تاہم ارجنٹینا نے تجربہ کار دفاع کے ذریعے برتری برقرار رکھی اور میچ 3-2 سے جیت لیا۔

میچ میں تیز رفتار کھیل، بھرپور جسمانی مقابلہ اور اعصابی دباؤ آخری لمحے تک برقرار رہا، جس نے شائقین کو مکمل طور پر محظوظ کیے رکھا۔