خیبرپختونخوا میں دہشتگردوں پر کاری ضرب، دو کارروائیوں میں 11 خوارج ہلاک

راولپنڈی: خیبرپختونخوا میں سکیورٹی فورسز نے دو الگ الگ کارروائیوں کے دوران 11 خوارج کو ہلاک کر دیا۔ پاک فوج کے شعبہ تعلقات عامہ ISPR کے مطابق شمالی وزیرستان میں انٹیلی جنس بیسڈ آپریشن کیا گیا، جہاں شدید فائرنگ کے تبادلے میں 6 خوارج مارے گئے، جبکہ ضلع کرم میں پولیس اور سکیورٹی فورسز کی مشترکہ کارروائی میں مزید 5 خوارج ہلاک ہوئے۔

آئی ایس پی آر کے مطابق ہلاک ہونے والے خوارج کا تعلق بھارتی پراکسی فتنہ الخوارج سے تھا۔ کارروائیوں کے دوران دہشتگردوں سے بھاری مقدار میں اسلحہ اور گولہ بارود بھی برآمد ہوا، جبکہ یہ عناصر دہشتگردی اور ٹارگٹ کلنگ کی متعدد وارداتوں میں ملوث تھے۔

فوج کے ترجمان کا کہنا ہے کہ سکیورٹی فورسز اور پولیس کی کلیئرنس کارروائیاں تاحال جاری ہیں اور علاقے میں مزید خوارج کی تلاش کا عمل جاری ہے۔ بیان میں کہا گیا کہ عزمِ استحکام کے تحت انسدادِ دہشتگردی مہم پوری شدت سے جاری رکھی جائے گی اور غیرملکی سرپرستی یافتہ دہشتگردی کے مکمل خاتمے تک کارروائیاں جاری رہیں گی۔